Տորթ՝ կնոջ մատներ

2018

Էկլերի այլընտրանք կամ դասական համեղություն: Ինչպես կուզեք՝ անվանեք, դրանից ոչինչ չի փոխվի: Եթե ծանոթ չեք այս համեղությանը, առաջարկում եմ միանալ մեզ:

Մեզ օգնելու համար այսօր մեր խոհանոցում է Կարինե Օհանյանը: Նրա պատրաստած գեղեցիկ աղանդերն այսօր զարդարում է մեր էջը:

Նախ գրանցեք բաղադրիչները.

Խմորի համար

Ջուր 180 գ

Ալյուր 200 գ (սա հավասար է 250 գրամանոց բաժակով բերնեբերան, բաժակից էլ քիչ բարձր ալյուրին)

Կարագ 100 գ

Ձու 5-6 հատ

Աղ 1 պտղունց

Կրեմի համար

Սերուցք կամ թթվասեր 900-1000 գ

Շաքարի փոշի 220 գ

Վանիլին

Սկսենք կրեմից: Եթե նախընտրում եք սերուցք, ապա այն պետք է հարել շաքարի փոշու հետ միասին մինչ լավ պնդանալը: Շաքարի փոշին ցանկալի է  ավելացնել այն ժամանակ, երբ սերուցքը մի փոքր արդեն սկսում է պնդանալ:

Եթե պատրաստում եք թթվասերով, ապա թթվասերի մեջ ավելացնում եք շաքարի փոշին ու հարում, բայց ոչ շատ արագ, մեծ արագությունից թթվասերը կջրիկանա:  Ցանկալի է  հարել ձեռքի զսպանակով, այսպես ավելի ապահով է: Վերջում ավելացնում ենք նաև վանիլին:

Չժանգոտվող մետաղից կամ էմալապատ ամանի մեջ լցնում ենք ջուրը, կարագն ու աղը: Դնում ենք մարմանդ կրակին, եփում ենք մինչ կարագը հալվի ու ջուրը եռա: Հենց եռաց, ավելացնում ենք նախապես մաղված ալյուրն ու արագ խառնում՝ կրակից չվերցնելով: Սա խառնելով եփում ենք այնքան ժամանակ, մինչ խմորը սկսի ամանի տակից հեշտությամբ պոկվել:

Խմորը կրակից վերցնում ենք, տեղափոխում այլ ամանի մեջ: Մեջը հատիկ-հատիկ ավելացնում ենք նախապես հարված սենյակային ջերմաստիճանի ձուն: Ամեն մի ձուն ավելացնելուց հետո պետք է լավ խառնել, նոր միայն ավելացնել մյուսը:

Պատրաստի խմորը լցնում ենք խոհարարական ձևավորման տոպրակի մեջ ու երկարավուն էկլերների պես տեղավորում ենք ջեռոցի տապակի մեջ: Տապակը կարող է ուղղակի ալյուրոտ լինել, կարող եք օգտագործել նաև յուղաթուղթ:

Տապակը խմորի հետ միասին տեղավորում ենք նախապես 200 աստիճան տաքացած ջեռոցում ու թխում 10 րոպե, որից հետո ջերմաստիճանն իջեցնում ենք ու 10-12 րոպե թխում 180 աստիճանով:

Թխված էկլերները թողնում ենք սառեն, որից հետո հատիկ-հատիկ թաթախում ենք պատրաստի կրեմի մեջ ու դասավորում 26 սմ տրամագծով ամանի մեջ: Վերջում կրեմ ենք քսում ու ձևավորում՝ ըստ ցանկության:

Կարինեն կրեմի վերջին շերտի վրա կակաո է ցանել, իսկ տորթը զարդարող ծաղիկները ստացել է սպիտակ շոկոլադից:

կնոջ մատներ

 

Woman.am-ի խոհանոցում արդեն շատ տարբերակներ կան, ընտրեք այսօրվա ձեր տրամադրությանը համապատասխան համեղություն, պատրաստեք և հյուրասիրեք բոլորին:

Մինչ նոր համեղ հանդիպումներ 😉

# .am domains AMD 8000