Ո՞վ չի սիրում մեղրով տորթը՝ նուրբ ու հալվող շերտերով, չափավոր քաղցր կրեմով, երեսին՝ ջնարակ կամ ուղղակի խմորի փշուրներ…

Սիրում եմ և ես, բայց վերջին ժամանակներում ավելի շատ սիրում եմ ոչ թե ուտել, այլ փորձեր կատարել:

Էս անգամ էլ որոշեցի ու մեղրով տորթը ջրային բաղնիքի փոխարեն եփեցի հենց կրակին դրված: Կրակը միջինից ցածր էր:

Մի կարևոր բան ասեմ, նոր անցնեմ պատրաստմանը. ուղիղ կրակին մեղրով տորթը եփել ցանկալի է միայն այն դեպքում, եթե խմորը չեք նախատեսել երկար եփել: Եթե թռչնի կաթ եք պատրաստում և ծակոտիներով շերտ եք ուզում ստանալ, ապա գոլորշին անհրաժեշտ է: Իսկ կրակի վրա վերջին ժամանակներում պատրաստում եմ Սպարտակի, երբեմն նուտելլայի խմորը, որոնք հենց իրենց տեսակով չպետք է շատ ծոկոտիներով լինեն ու եփվում են ընդամենը այնքան, մինչև շաքարավազն ու կարագը հալվեն: Իսկ այ ծակոտիներով խմորները ստացվում են երկար ջերմային ազդեցության արդյունքում:

Ինչևէ, Պատրաստում ենք Սպարտակ տորթը:

Կաթսայի մեջ կոտրում ենք 5 ձու, թույլ հարում 250 գրամանոց բաժակով լիքը շաքարավազի հետ ու դնում միջինից ցածր կրակին: Անդադար խառնելով, ոչ հարելով՝ եփել եմ մինչ շաքարը հալվի կամ գրեթե չզգացվի շոշափելիս: Ավելացրել եմ 3 ճաշի գդալ արհեստական մեղր, խառնել եմ, որ լուծվի ու ավելացրել եմ 100 գ կարագ՝ մանր կտրատած: Մանր եմ կտրատել, որ շուտ լուծվի, ավելորդ ժամանակ չպահանջի: Կարագը հենց հալվեց, ավելացրել եմ 1 թեյի գդալ սոդա, խառնել եմ ու վերցրել կրակից:

Ուշադրություն. քանի որ խմորի համար օգտագործել եմ արհեստական մեղր, ապա վերջում, կամ կրակից վերցնելուց առաջ, կամ հենց վերցնելուց հետո անհրաժեշտ է ավելացնել 1 ճ գդալ քացախ: Իսկ եթե մեղրը բնական է, ապա քացախի կարիք չկա, պարզապես ավելացնում ենք սոդան, խառնում ու վերցնում կրակից:
Տեսեք, սովորաբար մեղրով խմորների բաղադրատոմսերում գրված է 1.5-2 գդալ սոդա: Ինչի՞ համար մենք քիչ ավելացրեցինք, որովհետև եթե նախկինում սոդան լցրել են խմորը եփելու սկզբում, եփելից ազդեցությունը թուլացել է, դրա համար էլ ստիպված շատ են ավելացրել, իսկ մենք վերջում ենք ավելացնում, սոդան իր ողջ ուժով գործում է, կորուստ չենք ունենում:

Տաք վիճակում խմորի մեջ մաղում ենք երկու բաժակ ալյուր և 5-6 ճաշի լիքը գդալ կակաո, խառնում, դարձնում ենք համասեռ զանգված ու դնում մի կողմ, որ սառի: Սա կտևի մոտ 30 րոպե:

Ի դեպ, իմ մյուս նյութերին կարող եք ծանոթանալ Arusyak Hokhikyan’s group-ում:

30 րոպեն արագ անցավ, աչքներս չհասցրինք թարթել, հիմա արդեն ժամանակն է խմորը վերջնական տեսքի բերելու: Ավելացնում ենք քիչ –քիչ մաղած ալյուր ու հունցում ենք փափուկ, էլաստիկ խմոր, նուրբ, պլաստիլինի պես պետք է ստացվի: Ամբողջ խմորը կտանի մոտ 5 բաժակ ալյուր, կամ մի փոքր ավել, կախված ալյուրի տեսակից, ու ձեր օգտագործած մնացած բաղադրիչներից: Ինձ մոտ 5 բաժակից մի փոքր ավել ալյուր օգտագործվեց, առաջին անգամ չափել եմ ալյուրը:

Խմորին երշիկի տեսք ենք տալիս, մեջտեղից երկու կես անում, ստացված կեսերից յուրաքանչյուրը կիսում ևս երկու մասի: Ստացանք 4 կտոր, դրանցից ամեն մեկը բաժանում ենք մեջտեղից ու ստանում ուղիղ 8 կտոր խմոր: Գունդ ենք անում ու ծածկում սրբիչով:

Կարծում եք վերջացա՞վ: Ո՜չ, ամենակարևոր աշխատանքը դեռ առջևում է:

Յուրաքանչյուր գունդը մի փոքր ալյունք տապակի հակառակ կողմի վրա ու շարունակում համապատասխան չափսով բացել հենց այնտեղ: Ի դեպ, մեղրով խմորները թխելիս յուղաթղթի կամ ձեթ ու յուղ քսելու կարիք չկա, բավական է միայն ալյուր ցանել:

Գրտնակում ենք մեր տապակի չափսով, եթե հավասար չեք գրտնակել, կտրում ենք եզրերը, ծակծկում պատառաքաղով ու տեղավորում ենք նախապես 180-200 աստիճան տաքացված ջեռոցը մինչ պատրաստ լինելը:

Զգուշացեք, ինձ մոտ, եթե լուսանկարում հաշվեք, 8 շերտից միայն 7-ն է, քանի որ վերջին շերտերից մեկը մի փոքր այրվել էր))))

Շերտերը հերթով թխում ենք ու թողնում սառեն:

Ասեմ, որ խմորեղեն պատրաստելիս, եթե օգտագործվելու է եփովի կրեմ, ցանկալի է այն պատրաստել նախապես, որպեսզի շերտերի պատրաստ լինելուն պես հասցնի սառչել ու հասնել սենյակային ջերմաստիճանի:

Եփովի կրեմի իմ տարբերակը հետևյալն է:

3-4 դեղնուցը հարում ենք 1 բաժակ շաքարավազի հետ, ավելացնում 3 լիքը ճաշի գդալ ալյուր կամ օսլա, մի քանի գդալ կաթի հետ խառնում ենք այնպես, որ դեղնուցը հավասար տարածվի ու այս զանգվածի վրա լցնում ենք եռման մոտ 500 գ կաթ, բարակ շիթով ենք լցնում ու անդադար հարելով, հակառակ դեպքում կրեմը համասեռ չի ստացվի: Այնուհետև դնում ենք կրակին ու եփում մինչ պնդանալը: Կրակից վերցնում ենք, թողնում սառչի:

200 գ սենյակային ջերմաստիճանի կարագը հարում ենք այնքան, մինչ սպիտակի, գդալ-գդալ ավելացնում ենք արդեն սառած եփովի կրեմը: Հարում ենք միջին արագությամբ:

Պատրաստ են և կրեմը, և շերտերը:

Յուրաքանչյուր շերտին քսում ենք շերտի հաստությունից ոչ ավել հաստության կրեմ: Ավել քսելու դեպքում շերտերն ուղղակի չեն կարողանա ներքաշել ավելորդն ու կտրելիս խմորի շերտերը կամ կշարժվեն կամ կրեմը դուրս կգա: Վերջին շերտին կարող եք կրեմ չքսել: Մեղրով շերտերը հանգիստ կարող եք առանց կրեմ քսելու անմիջապես ջնարակապատել: Ընտրությունը ձերն է:

Փայլուն ջնարակ Արուսյակից նյութում մանրամասն կտեսնեք ջնարակի իմ տարբերակը:
Խմորեղենը խորհուրդ է տրվում կտրել պատրաստելուց ամենաքիչը 5-6 ժամ անց, այդ ընթացքում կրեմը հասցնում է <<սնուցել>> և փափկեցնել շերտերը, դրանից էլ կտրվածքը գեղեցիկ ու մաքուր է ստացվում:
Մի փոքր ժամանակատար աշխատանք է, բայց երբ սեղանին փայլում է նման շքեղ ու անչափ համեղ խմորեղենը, մոռանում ես ողջ դժվարության մասին:

Պատրաստեք և վայելեք մի գավաթ սուրճի հետ, հարազատները հաստատ կգնահատեն:

Իսկ Woman.am-ը կշարունակի փնտրել ձեզ համար հետաքրքիր, ճանաչված ու նոր, հեշտ ու մի փոքր աշխատատար, բայց միշտ շատ համեղ բաղադրատոմսեր:
Այլ հետաքրքիր տարբերակներ փնտրեք մեր էջերում և հետևեք թարմացումներին: