Պանրով և կարտոֆիլով կարկանդակներ

1509

Համեղ ու տնական կարկանդակ պատրաստելու տրամադրություն ունեմ, իսկ դո՞ւք:

Եթե սիրում եք, միացեք ինձ.  woman.am –ի խոհանոցում աշխատանքը եռում է:

Մեկ բաժակ գոլից քիչ տաք կաթի մեջ ավելացնում ենք 1 ճ գդալ խմորիչ ու  1 ճ գդալ շաքարավազ, թողնում ենք հանգստանալու: Երբ խառնուրդը փրփրած լինի, ավելացնում ենք ևս մեկ բաժակ գոլից քիչ տաք արդեն ջուր, մեկ ճ գդալ աղ: Խառնում ենք, ավելացնում ենք  նախապես հարած ձու և 5 ճ գդալ բուսայուղ: Հունցում ենք ու ստանում փափուկ, նուրբ, ձեռքերին մի փոքր նաև կպչուն խմոր: Ծածկում ենք մեր խմորը որևէ կափարիչով կամ սրբիչով ու որևէ տաք տեղում թողնում ենք 1.5-2 ժամ հանգստանալու և թթվելու:

Այս ընթացքում գտեք ինձ ֆեյսբուքում, միացեք իմ՝ Arusyak Hokhikyan’s group խմբին՝ բոլոր նորություններին առաջինը տեղեկանալու և հարցերին պատասխան ստանալու  համար:

Այս ընթացքում նախապատրաստում ենք կարտոֆիլի պյուրեն ու քերած պանիրը:

Սովորական կարտոֆիլի պյուրեին ավելացնում ենք նախընտրած կանաչիները, աղ, պղպեղներ, ես նաև սոխառած եմ ավելացում՞: Խառնում ենք, թողնում սառի:

Առանձին ամանի մեջ քերում ենք նաև հալվող պանիրը, ավելացնում ենք աղ, եթե անալի է, և համեմունք ու կանաչիներ՝ ըստ ցանկության:

Ուռած ու լավ թթված խմորը քիչ ալյուրով հունցում ենք, ստանում չկպչող, փափուկ, ենթարկվող խմոր: Բարակ գրտնակում ենք խմորը, վրան դնում ենք միջուկից, ծածկում ենք մյուս բարակ գրտնակված շերտով: Ուռուցիկ միջուկով կողմնորոշվելով՝ երկշերտ խմորը կտրում ենք որևէ դակիչով կամ ուղղակի բաժակով, ինչպե ես եմ արել: Կտրված կիսաֆաբրիկատ կարկանդակները թողնում ենք հանգստանալու՝ սեղանին՝ սրբիչով ծածկված՝ 20-30րոպե: Թխում ենք առատ ձեթի մեջ՝ երկու կողմից մինչ վարդագունելը:

Միջուկը կարող եք օգտագործել երեք տարբերակով.

  1. Կարտոֆիլ+քերած պանիր. որից որքան, որոշեք ինքներդ
  2. Քերած պանիր +կանաչի
  3. Կարտոֆիլ+սոխառած+համեմունք

Նշեմ, որ միայն պանիրով տարբերակը ևս հրաշալի է ստացվում, խորհուրդ եմ տալիս փորձել միաժամանակ բոլոր տարբերակներն էլ՝ ընտանիքի անդամներին անակնկալ կարկանդակներ մատուցելու համար:

Այսօր էլ այսպես: Համեղ կարկանդակներով թեյ հյուրասիրեք սիրելիներին. վստահ եմ՝  կհավանեն բոլորը:

Սիրով ձեր՝ woman.am: