Ունիվերսալ խմոր

Ամենօրյա համեղ կարկանդակներ, փոքրիկ հացիկներ, պիցցաներ, հոթ դոգեր,  տարբեր միջուկով մեծ փակ կարկանդակներ և այլն կարող եք պատրաստել ընդամենը մեկ բաղադրատոմս լավ հիշելով:

Հենց այդ պատճառով էլ այս խմորն անվանել եմ ունիվերսալ խմոր:

Բաղադրատոմսն ավելի քան հեշտ է.

Մեզ անհրաժեշտ է

300-400 գ կաթ

1 ճաշի գդալ խմորիչ

1 ոչ լիքը ճ գդալ աղ

1 ոչ լիքը ճ գդալ շաքարավազ

1 ձու

1,5 սուրճի բաժակ ձեթ

Ալյուր

Ձու՝ երեսին քսելու համար

Քունջութ, կակաչի սերմեր՝ ըստ ցանկության

 

ի դեպ, տարբեր տեսակ արկանդակների և այլ բաղադրատոմսեր շատ ունեմ, այստեղ են՝ Arusyak Hokhikyan’s group -ում

Նախապես մի կարևոր բան ասեմ՝ այս խմորը կարելի է պատրաստել նաև որպես պասային խմոր՝ առանց ձվի, կաթի փոխարեն էլ ջուր օգտագործելով: Ասեմ, որ շատ թեթև խմոր է ստացվում կրկին, միայն հաշվի առեք, որ ձվով խմորն ավելի երկար է պահպանում թարմությունը: Երեսին էլ ալյուրով ու ջրով եփված զանգված պատրաստեք ու քսեք, որ լավ կարմրի՝ ձվի փոխարեն: Ահա և պասային բաղադրատոմս:

 

Կաթը եռացրեք, թողեք հովանա, որ գոլից քիչ տաք լինի: Մի բաժակի մեջ նախատեսված քանակի կեսի չափ գոլից քիչ տաք կաթ լցրեք, մեջը լուծեք խմորիչն ու շաքարավազը, մի քանի ճաշի գդալ ալյուր խառնեք, որ ջրիկ զանգված լինի, թողեք տաք սենյակում, որ խմորիչը սկսի աշխատել: 15-20 րոպեն լիովին բավարար է:

Երբ այս զանգվածը լավ կհասունանա, կփրփրի, խմորի մեծ թասի մեջ լցնում ենք մնացած կաթը, ավելացնում ենք խմորիչով զանգվածը: Լավ խառնում ենք, ավելացնում ենք աղը, մեջը կոտրում ենք ձու, ավելացնում ենք նաև մեկ սուրճի բաժակ ձեթ, մնացածը վերջում հունցելու համար ենք թողնում:

Զանգվածը լավ խառնում ենք ու մաղելով սկսում ավելացնել ալյուրը: Ինտենսիվ ենք հունցում: Խմորը պետք է լինի թեթև ու շատ փափուկ, էլաստիկ: Սա արդեն կախված է նրանից, թե որքան ինտենսիվությամբ կհունցեք:

Այն պահին, երբ թվում է, թե խմորի խտությունը նորմալ է, բայց դեռ  որոշ չափով կպնում է սեղանին և ձեռքերին, սկսեք հուցել ձեթոտ ձեռքերով, մի փոքր ձեթ էլ քսեք աշխատանքային մակերեսին՝ սեղաին, ու խմորը շորունակեք հունցել այդպես: Սա օգնում է խնայել 0.5-1 բաժակ ալյուր,հետևաբար խմորը այս քանակի ալյուր պակաս է ստանում:

Շնորհավորում եմ մեզ, փափուկ ու լավ խմոր ենք հունցել: Հիմնական աշխատանքը կարող ենք ավարտված համարել:

Հիմա խմորը վերադարձնում ենք թասի մեջ, ծածկում ենք սրբիչով, դնում տաք որևէ տեղ ու սպասում 20-30 րոպե:  Ավել սպասելու կարիք չկա, խմորն այնքան ենք տանջել, որ դա էլ լիովին բավարար է:

Ժամանակը լրանալուն պես կարելի է աշխատել խմորի հետ: Եթե հոթ դոգ եք ցանկանում պատրաստել, ապա խմորը բաժանեք 3 մասի, յուրաքանչյուր մասը բարակ բացեք կլոր ու խաչաձև կտրվածքներով՝ բաժանեք 8 սեգմենտների: Խաչաձև կտրվածք ասելով՝ նկատի ունեմ՝ ինչպես, որ, օրինակ, պիցցան ենք կտրում, որ եռանկյունի մասերի է բաժանվում: Արտաքին կողմից դնում ենք նրբերիշիկն ու կռուասանի նման փաթաթում ենք դեպի սուր ծայրը:

Եթե կարկանդակ եք պատրաստում՝ մսով կամ կարտոֆիլով, կամ կաղամբով, ապա խմորը բաժանեք ընկույզից քիչ մեծ գնդերի, բացեք ձեռքերի կամ գրտնակի օգնությամբ ոչ շատ բարակ, մեջտեղում դրեք միջուկն ու փակեք՝ ծայրերը հավաքելով:

Ես այս խմորով պատրաստում եմ նաև տարբեր միջուկներով մեծ կարկանդակներ՝ պիրոգներ: Պատրաստում եմ նույն գաթայի սկզբունքով՝ խմորը մի 25-30 սմ տրամագծով բացում եմ, մեջտեղում դնում առատ միջուկը, եզրերը հավաքում եմ խինկալիի պես, շուռ եմ տալիս կարով դեպի ներքև, ձեռքով կամ գրտնակով զգուշորեն հարթեցնում եմ ու մի քիչ բացում ոչ շատ բարակ: Կենտրոնում փոքրիկ անցք եմ թողնում, որ գոլորշին դուրս գա:

Տարբեր ժամանակներում պատրաստում եմ այս կարկանդակների համար տարբեր միջուկներ: Օրինակ՝ խաշած ձու+կանաչ սոխ, կամ խաշած ձու+առատ թարխունի թերթիկներ, կամ հավի նախապես խաշված միս+քերած ու սոխառածի հետ թույլ տապակած գազար+կանաչիներ+համեմունք+շատ քիչ թթվասեր+տոմատ (ոչ շատ, որ խմորը չթրջվի), կամ սոխառածի ու շատ քիչ տոմատի հետ տապակած կաղամբ և այլն…

Կարևոր է իմանալ, որ այս խմորը ձևավորելուց հետո պետք է դնել հենց տապակի վրա, որ ուռչելուց հետո ջեռոցը դնելիս էլ չտեղաշարժեք, դրանից կարկանդակները կարող են լավ չբարձրանալ, չփքվել:

Խմորը, անկախ նրանից, թե ինչ ենք պատրաստում, հարկավոր է թողնել տապակի վրա հանգստանան մի 10 րոպե, այս ընթացքում գուցե շատ չբարձրանան, ոչինչ, ջեռոցում դրանք պակասն անպայման կլրացնեն:

Նման խմորների դեպքում ձուն հարկավոր է քսել ջեռոցը դնելուց անմիջապես առաջ, այսպես խմորն ավելի թեթև է բարձրանում:
Այս խմորով ցանկացած թխուկ պատրաստում եք նախապես 200-220 աստիճան տաքացված ջեռոցում՝ մինչ գեղեցիկ գույն ստանա: Խմորիչով խմորներն առհասարակ 200 աստիճանից ցածր ջերմաստիճան չեն սիրում, նեղանում են ու լավ չեն բարձրանում, կան հետո չորանում են 😉

Խմոր

Այսքանը: Էսպիսի գեղեցիկ զանբյուղով դիմավորեք ձեր սիրելիներին: Ընթրիքից պակասում է միայ լավ թեյը կամ տաք կաթը: Ձեզ բարի ախորժակ, իսկ ես թերթեմ տետրերս: Նորույթներով կհանդիպենք կրկին Woman.am-ի խոհանոցային էջերում:

Մինչ նոր համեղ հանդիպումներ:

#jobs in Yerevan

#rak

#translations