Արդեն դասական դարձած խմորեղեններից առաջարկում եմ այսօր պատրաստել այս շոկոլադային համեղությունը:

Տատիկների ու մայրիկների բաղադրատոմսերի տետրում կհանդիպեք Պրահայի տարբեր բաղադրատոմսերի:

Մարինե Մանուկյանը մեզ առաջարկում է իր տարբերակը, որը պատրաստելու համար նա այսօր մեր խոհանուցում է: Միասին մենք սարեր շուռ կտանք, մի տորթն ինչ է,որ չթխենքJ

Դուք ևս միացեք: Բայց նախ գրանցեք բաղադրիչները: Մեզ անհրաժեշտ է.

 

Խմորի համար

4 ձու

1 բաժակ շաքարավազ

1 բաժակ 20-տոկոսանոց թթվասեր

150 գ խտացրած կաթ

1 թեյի գդալ սոդա

1 ճաշի գդալ 9-տոկոսանոց քացախ

3 ճաշի գդալ կակաո

1.5 բաժակ ալյուր

 

Կրեմի համար

 400 գ կարագ

200 գ խտացրած կաթ

2 ճաշի գդալ կաակո

 

Ջնարակի համար

400 կաթ

3 ճ գ կակաո

3 ճաշի գդալ շաքարավազ

30 գ կարագ

Խմորը ցողելու համար

1 բաժակ կոնյակ

1 բաժակ շաքարավազ

 

Երկար բարակ գրանցելուց հետո անցանք բուն գործին:

Նախ շաքարավազն ու ձուն հարում ենք այնքան, որ ստացվի թեթև, 3 անգամ ավելի փքուն զանգված: Այնուհետև ավելացնում ենք թթվասերը, խառնում ենք, ավելացնում խտացրած կաթը, կրկին խառնում ենք, մինչ համասեռ զանգված ստացվի: Ավելացնում ենք նախապես իրար հետ խառնած ու մաղած կակոն ու ալյուրը: Վերջում ավելացնում ենք նաև քացախով մարած սոդան ու խառնում:

Խմորը լցնում ենք 24 սմ տրամագծով յուղաթղթով ձևամանի մեջ ու թխում 30-40 րոպե՝ 170 աստիճան նախապես տաքացված ջեռոցում: Պատրաստ լինելը կարելի է ստուգել չոփիկով:

Թխված խմորը դուրս ենք բերում ձևամանից, ազատում յուղաթղթից, թողնում ենք, որ լավ սառի: Որից հետո սուր երկար դանակով, կամ հատուկ կտրելու միջոցներով այն բաժանում ենք երեք հնարավորինս հավասար մասերի:

Այսպես թողնում ենք մի կողմում, որ խմորը վերջնական սառի, իսկ մենք անցնում եք կրեմի պատրաստմանը: Ասեմ որ դեռ տաք վիճակում խմորը կտրել խորհուրդ չի տրվում:

Սենյակային ջերմաստիճանի կարագը լավ հարում ենք, որից հետո քիչ-քիչ ավելացնում  ենք խտացրած կաթը և շարունակում հարել: Վերջում ավելացնում ենք կակաոն, հարում, մինչ այն լավ տարածվի կրեմի մեջ:

Կրեմն էլ ունենք:

Հիմա խմորը փափուկ մնալու համար անհրաժեշտ է նաև հեղուկը, որով այն կցողենք: Ցանկալի է այն եփել նախապես, քանի որ բավական ժամանակատար է ու պետք է հասցնի սառել:

Դրա համար կոնյակն ու շաքարավազը միասին դնում եք միջին կրակին ու եփում այնքան, մինչ հեղուկը մի փոքր թանձրանա: Լցնում ենք այլ տարայի մեջ ու թողնում սառչի:

Սառելուց հետո այս հեղուկով շռայլորեն ցողում ենք խմորի շերտերը, դրանից անմիջապես հետո կարելի է  քսել կրեմն ու շերտերը հավաքել իրար վրա: Վերջին շերտի համար ցանկալի է կրեմ թողնել, որպեսզի հետագայում ջնարակով պատելիս խմորն այն չներծծի ու ջնարակը ժամանակից շուտ չխամրի:

Ի դեպ, ջնարակի գաղտնիքների ու առանձնահատկությունների մասին կարող եք կարդալ մեր էջերում, միայն հարկավոր է կայքի փնտրման տողում նշել Փայլուն ջնարակ և վերջ:

Ասեմ, որ ջնարակը ներքաշելուց խուսափելու համար հաճախ խորհուրդ է տրվում վերջին շերտին քսել որևէ խիտ ջեմի հյութ կամ խիտ եփված օշարակ:

 

Մարինեի առաջարկած ջնարակը պատրաստելու համար անհրաժեշտ է կակաոն և շաքարավազը խառնել իրար, այնուհետև քիչ-քիչ խառնելով ավելացնել նաև կաթն ու եփել մարմանդ կրակին մինչ խտանալը: Վերջում ավելացնում ենք  նաև կարագն ու վերցնում կրակից:

Ջնարակը օգտագործում ենք մոտ 40 աստիճանում, երբ այն ոչ շատ սառն է, որ չկարողանանք հարթ տարածել, ոչ էլ այնքան տաք, որ ներծծվի:

Մի տեսեք՝ ինչ շքեղ տորթ ստացանք: Ձեր տոնական սեղանները զարդարելու համար լավագույն լուծումներից մեկը ևս գտանք:

Woman.am-ը հետևողական է իր խոստմանն ու ներկայացնում է սիրված, ծանոթ ու անծանոթ, հեշտ ու մի փոքր աշխատատար, բայց միշտ լավ արդյուքնք խոստացող բաղադրատոմսեր:

Մեր առաջարկած մյուս տարբերակները փնտրեք մեր էջերում և սպասեք թարմացումներին:

Մինչ նոր համեղ հանդիպումներ:

Տեքստի հեղինակ՝ Արուսյակ Հոխիկյան (Arusyak Hokhikyan’s group)