Advertisementjobs.am

Տղամարդիկ Մարսից են, կանայք` Վեներայից: Մենք խոսում ենք նույն լեզվով, բայց խոսքերն ընկալում տարբեր կերպ: Աղջիկնե’ր, առողջ հարաբերություններ ունենալու ու պահպանելու համար անհրաժեշտ է հստակ գիտակցել` ժամանակ առ ժամանակ պետք է լռել:

Ներկայացնենք մի քանի արտահայտություն, որոնք ԵՐԲԵՔ չի կարելի ասել սիրած տղամարդուն:

Դու մեղավոր ես

Եթե անգամ դա բացարձակ ճշմարտություն է, նրա մեղավոր լինելն իրավիճակը չի փրկի: Այդ պահերին չափազանց նյարդայնացած լինելու դեպքում պարզապես խորը շունչ քաշեք ու անցեք կառուցողական երկխոսության, ոչ թե մեղավորներ փնտրելուն: Հիշե’ք՝ հարաբերությունների պատասխանատվությունը երկու կողմի վրա է, ուստի փորձե’ք լուծումներ գտնել:

 Ես ինքս կանեմ

Դուք խնդրել եք Ձեր սիրելիին օգնել Ձեզ որևէ հարցով, բայց տեսնում եք` օգնությունը երկարում է կամ Ձեր ուզած ձևով չի ընթանում: Ու, բնականաբար, այդ պահին սկսում ենք պնդել` ինքնուրույն կանենք, մենք ճիշտ ձևը գիտենք:

Աղջիկնե’ր, եկենք մեկընդմիշտ հասկանանք մի բան. հաջորդ անգամ Ձեզ ոչ ոք էլ օգնության չի գա: Այդքանը:

Սիրելիս, առանց քեզ չեմ կարողանա ապրել

Շատ ռոմանտիկ արտահայտություն է, հիրավի: Արտահայտություն, որից Ձեր սիրելին վախենում է. չէ՞ որ Ձեր կյանքի պատասխանատվությունը բարդում եք իր վրա: Խորհուրդ կտանք արտահայտել զգացմունքն ուրիշ ձև, օրինակ` անակնկալներով:

Քեզ փոքրիկ երեխայի պես մի’ պահիր

Եթե չեք հավանում, որ Ձեր զուգընկերը, օրինակ, օնլայն խաղերի սիրահար է և խաղերի հաշվին Ձեզ ժամանակ չի հատկացնում, չի օգնում տան հարցերում, մի’ բարկացեք: Գոյություն ունի հոյակապ միջոց այս խնդրի դեմ` հարաբերություններում ներդրեք այնքան ուժ ու ժամանակ, որքան Ձեր սիրելին: Ի դեպ, փոքրիկ տղաները հիմնականում ընտրում են մեծ մայրիկների: Հերիք է մայրիկի դեր տանեք նրա համար: Դա կստիպի նրան մեծանալ:

Կամ ԵՍ, կամ …

Ընտրություն առջև տղամարդուն կանգնեցնելը հարաբերությունները խզելու ամենաարագ ու հեշտ միջոցն է: Ինչ-որ մի բան արգելելով` դուք բացարձակապես չեք ազդում տղամարդու ներքին ցանկությունների վրա: Միգուցե նա սկզբից ընդունի Ձեր ասածը, բայց մի օր բումերանգի պես այն հետ կվերադառնա: Ասացե’ք` ինչ եք ուզում Դուք, և հնարավորություն տվեք տղամարդուն ինքնուրույն ընտրություն կատարելու:

Ե՞րբ է հարսանիքը

Եթե Ձեզ սկսել է հուզել այս հարցը, ապա ուշադրություն դարձրեք նրա վերաբերմունքին Ձեր անձի հանդեպ. դա ավելի շատ տեղեկատվություն կտա Ձեզ, քան այդ հարցը տալը:

«Friends» հեռուստասերիալից մի դրվագ

Երբ ենք հանդիպելու հաջորդ անգամ

Այս հարցը թողեք տղամարդուն: Ինչքան էլ զարմանալի թվա, տղամարդուն ավելի հաճելի է զգալ, որ հենց նա է պայքարում Ձեզ համար, ոչ թե հակառակը

Սիրո՞ւմ ես ինձ

Հարցնելով սա` նշանակում է կասկածել զուգընկերոջը: Դրանից բացի՝ այս հարցը նաև վկայում է Ձեր անինքնավստահ լինելու մասին: Աշխատե’ք Ձեր ինքնազարգացման վրա, սովորե’ք ինչ-որ նոր բան, կենտրոնացե’ք Ձեր պահանջմունքների վրա, քիչ ժամանակ անցկացրեք սիրելիի հետ և շուտով կհասկանաք՝ կարոտում է, թե ոչ:

Սիրե՛ք ձեր տղամարդուն, գնահատե՛ք նրան և մի տվեք ավելորդ հարցեր 😉