Աննա Ամոյանն առաջարկում է Ամանորին պատրաստել այս չափազանց մատչելի, հեշտ խմորեղենը: Կատակը կատակ, բայց մեր գործերը մնացին: Woman.am-ի խոհանոցում մեզ նոր բացաայտումներ են սպասում:
Անցանք գործի: Գրում ենք բաղադրիչները:
Խմորի համար
2 ձու
2 բաժակ շաքարավազ /200-250 գ բաժակով/
2 բաժակ մածուն
2 ճաշի գդալ քացախ
2 թեյի գդալ սոդա
4 ճաշի գդալ կակաո
1.5 սուրճի բաժակ բուսայուղ /մոտ 150 գ/
2 բաժակ ալյուր
Կրեմի համար
250 գ կարագ
1-2 տուփ եփած խտացրած կաթ
Վանիլին
1 ճաշի գդալ կոնյակ
Նախ ասեմ, որ այս խմորեղենը Աննան պատրաստել է ջեռոցի մեծ տապակով, եթե ձևամանը փոքր է, կարող եք չափաբաժինը պակասեցնել:
Իմ բոլոր բաղադրատոմսերն ու մյուս բոլոր մշակումները կարող եք գտնել իմ՝ Arusyak Hokhiokyan’s group ֆեյսբուքյան էջում: Գրանցվեք, միացեք իմ խմբին՝ նորույթներն առաջինը տեսնելու և բոլոր հուզող հարցերին պատասխան ստանալու համար:
Էլեկտրական հարիչ չենք օգտագործելու խմորի համար: Ձեռքի հարիչով հարում ենք ձուն և շաքարավազը: Այնուհետև ավելացնել հերթով մնացած բաղադրիչներն ու վերջում մաղելով ավելացնել ալյուրը:
Ստացվում է թույլ խմոր:
Բաժանում ենք երեք մասի, քսում յուղաթղթի վրա ու թխում նախապես միջինը 180 աստիճան տաքացած ջեռոցում 7-10 րոպե: Թխված լինելը ստուգում ենք ատամի չոփիկով:
Աննան զգուշացնում է, որ շերտերը շաատ նուրբ ու անչափ փափուկ են ստացվելու, ուստի դրանք խորհուրդ է տալիս տեղափոխել միայն այն ժամանակ, երբ կրեմով միացնելու լինեք իրար,ավելորդ անգամ շերտերը տեղափոխելուց խուսափեք, որ չվնասվեն:
Շերտերն իրար միացնում ենք հետևյալ կրեմով:
Պատրաստում ենք կրեմը:
Սենյակային ջերմաստիճանի կարագը հարում ենք հարիչով մի քանի րոպե: Կարագը պետք է լավ սպիտակի, սա կարևոր է: Այնուհետև քիչ-քիչ ավելացնում ենք նույնպես սենյակային ջերմաստիճանի եփած խտացրած կաթն ու շարունակում հարել: Ստացված կրեմին ավելացնում ենք կոնյակն ու վանիլինը՝ ըստ ճաշակի:
Կրեմը պատրաստ է:
Այս կրեմով իրար ենք միացնում թխված շերտերը, առատ կրեմ ենք քսում նաև վերին շերտին:
Մեր օգնականն իր խմորեղենը, ինչպես տեսնում եք լուսանկարում, ձևավորել է կակաոյով, իսկ դուք ինչպես կվարվեք, թողնում ենք ձեզ: Պատրաստելու դեպքում կիսվեք մեզ հետ. Փորձի փոխանակումը իմացության լավագույն աղբյուրն է:
Հեշտությամբ հաղթահարեցինք այս նրբությունը, այս համեղությունն ու շոկոլադագույն քաղցրությունը:
Խնայած ժամանակը կարող եք տրամադրել ինքներդ ձեզ, սիրելի կանայք: Տոներին գեղեցիկ զարդարված սեղանից բացի պետք է լինի նաև խնամված ու տոնական տեսքով տանտիկին:
Սիրով ձեր՝ woman.am