Շոկոլադի երկրպագուները թող հավաքվեն: Կրկին համեղ ու բուրումնավետ շոկոլադի համն ու բույրն ենք վայելելու:
Սիրո՞ւմ եք, ուրեմն եկեք միասին պատրաստենք:
Մեզ անհրաժեշտ են հետևյալ բաղադրիչները.
Խմորի համար
4 ձու
1 բաժակ շաքարավազ
100 գ հալած կարագ
3 ճաշի գդալ կակաո
100 գ կաթ
1 ճաշի գդալ կոնյակ
Վանիլին
1 թեյի գդալ սոդա
ալյուր
Կրեմի համար
0.5 տուփ եփած խտացրած կաթ
50-100 գ կարագ
Ի դեպ, նշեմ, որ իմ բոլոր բաղադրատոմսերը կարող եք գտնել Arusyak Hokhikyan’s group-ում:
Թասի մեջ կոտրում ենք ձուն ու հարիչով հարում շաքարավազի հետ: Հարել պետք է այնքան, մինչ զանգվածը լավ փրփրուն ու թեթև դառնա:
Կարագը հալեցնում ենք, տաք վիճակում մեջը լցնում կակաոն ու խառնում, թողնում ենք գոլանա, որից հետո գդալ-գդալ լցնում ենք ձվի զանգվածի վրա ու շարունակում հարել: Համասեռ զանգված ստանալուց հետո ավելացնում ենք կաթը, կոնյակն ու կրկին հարում: Հարիչն անջատում ենք դնում մի կողմ, շարունակելու ենք աշխատել ձեռքի հարիչով:
Մի բաժակ ալյուրի մեջ խառնում ենք սոդան, վանիլինը ու մաղելով ավելացնում խմորի վրա:
Լավ խառնում ենք ու ավելացնում կրկին մաղելով ևս այնքան ալյուր, որ ստացվի թթվասերի խտությամբ խմոր: Շատ թույլ խորհուրդ չէի տա պատրաստել, մի փոքր ծորացող միայն:
Թխում ենք մեկ շերտով՝ նախապես յուղաթուղթ փռած տապակով: Ես թխել եմ 180 աստիճան նախապես տաքացված ջեռոցում մինչ պատրաստ լինելը: Դա էլ ստուգել եմ չոփիկով: Տապակիս չափսը՝ 30×40 սմ:
Պատրաստի խմորի շերտը դուրս եմ բերել ջեռոցից, սրբիչի վրա թողել եմ սառչի, որից հետո վրան քսել եմ կրեմն ու ձևավորել կակաոյով ու ջնարակով: Այստեղ արդեն կրկին գործի դրեք ձեր երևակայությունը; Կարելի է ամբողջությամբ խմորեղենը ծածկել ջնարակով, որի մասին մանրամասն գրել եմ իմ փայլուն ջնարակ նյութում: այն գտնելու համար կայքի փնտրման տողում հարկավոր է գրել փայլուն ջնարակ: Կարող եք կրամի վրա ուղղակի շաղ տալ կակաո, կամ քերել շոկոլադ…
Պատմեմ նաև կրեմի մասին: Այն իրականում շատ հեշտ է ու արագ պատրաստվող:
Կրամի համար սենյակային ջերմաստիճանի կարագը լավ հարում ենք, մոտ 5 րոպե, որից հետո գդալ-գդալ ավելացնում ենք եփած խտացրած կաթն ու շարունակում հարել: Ես կրեմին ավելացրել եմ հալեցված 30 գ շոկոլադ, կարող եք ավելացնել նաև մի քանի գդալ գլազուր, կամ ուղղակի ձեթով բացված 1-2 ճաշի գդալ կակաո:
Այսքանը: Առավոտյան ձեր ընտանիքի անդամները սիրով կվայելեն այս շոկոլադային հրավառությունն ու հաստատ գոհ կմնան:
Woman.am-ի էջերում համեղ, շոկոլադային անուշեղենի բաղադրատոմսեր շատ կան, փնտրեք մեր էջերում և հետևեք նորույթներին:
Մինչ նոր համեղ հանդիպումներ 
