Երբ աղջիկները մի բան որոշում են, անհնար է չիրագործեն: Մանավանդ, երբ խոսքը վերաբերում է հագուստին ու աքսեսուարներին: Հենց այսպես էլ ստեղծվել է ԱՆԱՐ բրենդը: Արփին և Անահիտը քույրեր են: Նրանք ԵՊՀՔ–ի զարդակիրառական արվեստ և ժողովրդական արհեստներ բաժնում՝ ստացել են նկարիչ-վարպետի մասնագիտացում: Այնուհետև սկսել են համագործակցել տարբեր հեղինակավոր նորաձևության տների հետ: Արդյունքում, հիմնել են ԱՆԱՐ–ը՝ հայկականի ու ժամանակակիցի միքսով հետաքրքիր մոդելներ ստանալու, կայանալու, զարգանալու, ճանաչվելու….
– Խնդրում ենք պատմել՝ ինչպե՞ս առաջացավ սեփական բրենդ ունենալու գաղափարը:
Մեր ծնողները պատմում են, որ մենք դեռ 4 տարեկանից նկարում էինք և մանրամասն մեկնաբանում յուրաքանյուր պատկեր: Երբ արդեն 14 տարեկան էինք հայտարարեցինք, որ հագուստի մոդելավորողներ ենք դառնալու և հիմնելու ենք մեր ապրանքանիշը: Անվանումը այդ տարիքից էինք որոշել: Դեռ դպրոցական տարիներին ձևափոխում և նոր «շունչ» էինք հաղորդում մեր առօրյա ու տոնական հագուստներին՝ այդպիսով ունենալով յուրահատուկ զգեստապահարան: Հաճախ էին մոտենում մեզ ու հարցնում թե ինչ ապրանքանիշի են պատկանում մեր զգեստները:
– Ովքե՞ր են ներգրավված բրենդի ստեղծման աշխատանքներումո՞վ է Ձեր բրենդի հասցեատերը և ի՞նչ նյութեր են օգտագործվում:
Հիմնականում մենք երկուսս ենք, բայց մեզ շատ են օգնում են մեր ընտանիքի անդամները:
Ստեղծում ենք հագուստ այն կանանց ու աղջիկների համար՝ ովքեր սիրում են ձեռագործ աշխատանք ու ցանկանում են իրենց անհատականությունը փոխանցել հագուստի միջոցով:
Հիմնականում աշխատում ենք բամբակյա կտորներով: Օգտագործում ենք բարձրորակ և չգունաթափվող քարեր և ուլունքներ, որոնք յուրահատուկ փայլ են հաղորդում մեր զգեստներին։
– Դժվա՞ր է կայանալ ու նոր խոսք ասել շուկայում, ինչպես եք դիմակայում մրցակցությանը:
Շուկա մուտք գործելու ընթացքում պետք է սահմանել տարբերակիչ առանձնահատկություններ, որոնց միջոցով էլ հաճախորդները կճանանչեն ապրանքանիշը՝ ձևավորելով հաճախորդների համայնքը:
– Ի՞նչ պլաններ կան բրենդի զարգացման հետ կապված:
Բրենդի ճանաչելիության բարձրացում,մուտք արտասահմանյան շուկաներ և զանգվածային արտադրություն: Լինել կրողն ապրանքանիշի որդեգրած արժեքների՝ ազնիվ լինել հաճախորդների հանդեպ և անհատական մոտեցում ցուցաբերել նրանցից յուրաքանչյուրին:
-Ինչ դժվարությունների առաջ են կանգնում երիտասարդ աղջիկները՝ սեփական գործ նախաձեռնելիս:
-Դժվարությունների առաջ կանգնում են բոլոր ձեռներեցներն՝ անկախ գործունեության տեսակից և ծավալից: Երիտասարդները հիմնականում ունենում եմ փորձի կարիք: